Mae'r adran Gaffael yn delio â'r prynu cychwynnol, y cyflenwi a'r gwaredu, gan ymgorffori ystyriaethau cynaliadwyedd fel ffactorau economaidd, moesegol, moesol ac amgylcheddol.
Yn rhan o'r tîm canolog, mae caffael corfforaethol yn cwmpasu strategaeth, polisi, tendro, contractau, hyfforddiant, materion cenedlaethol a chymorth ar gyfer deiliaid cyllidebau. Rydym yn anelu at ddylanwadu ar drefniadau caffael cenedlaethol a threfniadau sy'n benodol i'r sector, ac at feithrin cydweithrediad.
Daeth Deddf Caffael 2023 i rym ar 24 Chwefror 2025. Mae'r ddeddfwriaeth yn ei gwneud yn ofynnol i gyflenwyr fod wedi'u cofrestru ar y Platfform Digidol Canolog (Gwasanaeth Dod o hyd i Dendr) ar gyfer pob contract dros £30,000 (gan gynnwys TAW). Bydd yr Awdurdod yn gofyn am Rif Adnabod Unigryw cyflenwr o'r Platfform Digidol Canolog cyn y gallwn ddyfarnu unrhyw gontractau i chi, felly rydym yn annog yn gryf i bob cyflenwr gofrestru os nad ydynt eisoes wedi gwneud hynny. Dilynwch y ddolen hon i gael arweiniad ar y broses gofrestru. Bydd cyfleoedd contract yr Awdurdod yn parhau i gael eu hysbysebu ar GwerthwchiGymru. Cofrestrwch ar GwerthwchiGymru i sicrhau eich bod yn cael hysbysiadau awtomataidd am gyfleoedd contract sy'n berthnasol i'ch busnes. Os ydych eisoes wedi cofrestru, gwnewch yn siŵr eich bod yn diweddaru eich proffil cyflenwr cyn cyflwyno unrhyw dendrau. Defnyddiwch y ddolen hon i gael cymorth a chanllawiau ynghylch y system GwerthwchiGymru.
Beth yw caffael cyhoeddus?
Caffael cyhoeddus yw'r broses lle mae cyrff cyhoeddus yn prynu nwyddau, gwasanaethau a gwaith gan drydydd partïon i ddiwallu anghenion cwsmeriaid a defnyddwyr gwasanaeth. Mae caffael yn cwmpasu'r holl weithgareddau, o nodi angen hyd at ddiwedd oes ddefnyddiol ased neu pan fydd yn cael ei waredu.
Mae'r Awdurdod yn caffael ystod amrywiol o gyflenwadau, gwasanaethau a gwaith. Er enghraifft, deunydd ysgrifennu, cyfleustodau, offer tân, offer gweithredol arbenigol, gwasanaethau hyfforddi, offer TGCh, cyflenwadau cymorth cyntaf, meddalwedd arbenigol, gwaith adeiladu, gwasanaethau cyfleusterau ac ati. Mae'r cyngor yn gwario dros £19 miliwn y flwyddyn ar gyfartaledd o sefydliadau allanol.
Pam gwneud busnes gydag Awdurdod Tân ac Achub Canolbarth a Gorllewin Cymru?
Mae'r Awdurdod wedi ymrwymo i sicrhau bod ei weithgareddau caffael yn cael eu cynnal yn effeithlon, yn effeithiol, yn unol â’r rheolau ac yn foesegol. Dylai ein gweithgarwch caffael hefyd gyfrannu at les economaidd, cymdeithasol, diwylliannol ac amgylcheddol trigolion Canolbarth a Gorllewin Cymru. Mae penderfyniadau caffael yn cael eu gwneud ar sail gwerth am arian ac nid ydynt yn seiliedig ar y gost isaf. Mae pob cyflenwr yn cael ei drin yn gyfartal ac yn cael ei asesu ar rinweddau eu tendr trwy iddo gael ei werthuso yn erbyn y meini prawf dyfarnu.
Pa reolau, rheoliadau a gweithdrefnau caffael y mae'r Awdurdod yn eu dilyn?
Mae'r ffordd y mae'r Awdurdod yn prynu nwyddau, gwasanaethau a gweithiau’n cael ei lywodraethu gan gyfraith y DU a gan Gyfansoddiad mewnol yr Awdurdod ei hun, sy'n cynnwys Rheolau Sefydlog Contractau.
Mae gan Gyngor Abertawe ofyniad cyfreithiol i gydymffurfio â Deddf Caffael 2023, sy'n llywodraethu'r ffordd y cynhelir caffael yn y sector cyhoeddus ar gyfer contractau sy'n uwch na'r trothwyon gwerth a nodir isod.
Trothwyon presennol (yn effeithiol o 1 Ionawr 2024 am ddwy flynedd):
|
Math o gytundeb
|
Trothwy
|
|
Nwyddau a Gwasanaethau
|
£207,720
|
|
Gweithiau
|
£5,193,000
|
Pwrpas Deddf Caffael 2023 yw annog cystadleuaeth agored a thryloyw a gyflawnir trwy dendro cystadleuol. Rhaid i bob achos o gaffael yn y sector cyhoeddus, gan gynnwys unrhyw un sy'n is na'r trothwyon hyn, gydymffurfio ag egwyddorion allweddol tryloywder a thegwch, cystadleuaeth agored, peidio â gwahaniaethu a chymesuredd.
Mae Rheolau Sefydlog yr Awdurdod ar gyfer Contractau yn nodi sut rydym yn sicrhau bod gwariant cyhoeddus yn dangos gwerth clir waeth beth yw gwerth y contract.
Cyn dod o hyd i gyflenwyr allanol, bydd yr Awdurdod yn nodi a ellir diwallu'r hyn sydd ei angen trwy gontract neu fframwaith sydd eisoes ar waith. Os na ellir gwneud hyn, bydd cais am ddyfynbris (RFQ) neu broses dendro yn cael ei chynnal yn dibynnu ar werth y contract.
Cyflenwyr Lleol
Mae'r Awdurdod wedi ymrwymo i ddatblygu'r economi leol a chefnogi cyflenwyr lleol. Ble bynnag y bo modd, gwahoddir cyflenwyr lleol i gyflwyno dyfynbris ar gyfer contractau gwerth isel, ac anogir hwy i gynnig am dendrau. Anogir pob cyflenwr i gofrestru gyda’r Gwasanaeth Dod o hyd i Dendr a GwerthwchiGymru i sicrhau eu bod yn cael hysbysiadau am gaffaeliadau sydd ar ddod. Ni all yr Awdurdod wahaniaethu o blaid cyflenwyr lleol. Dyfernir contractau yn seiliedig ar y meini prawf gwerthuso a nodir yn y gwahoddiad i gyflwyno dyfynbris/tendro. Fodd bynnag, rydym yn annog sefydliadau lleol i gynnig am gontractau gyda'r Awdurdod, ac rydym yn ceisio dileu unrhyw rwystrau a allai fodoli i fusnesau lleol llai.
Busnes Cymru
Mae gwasanaeth Busnes Cymru Llywodraeth Cymru yn cefnogi busnesau newydd a sefydledig yng Nghymru.
Mae eu gwasanaeth cymorth tendro yn rhoi cymorth ymarferol rhad ac am ddim i fusnesau bach a chanolig yng Nghymru i’w helpu i ddeall y broses gaffael. Byddant yn rhoi cymorth i baratoi holiaduron cyn-gymhwyso a thendrau yn ogystal â darparu templedi polisi a sesiynau hyfforddi rhad ac am ddim ar sut i dendro, sut i ddefnyddio GwerthwchiGymru ac ati.
Am gymorth ac arweiniad, gellir cysylltu â Chymorth i Dendro Busnes Cymru drwy ffonio 03000 603000 neu drwy borth gwe Busnes Cymru.
Strategaeth Gaffael Gymdeithasol Gyfrifol 2026 – 2031
Gweler isod ddolen i'n Strategaeth Gaffael Gymdeithasol Gyfrifol 2026 – 2031, sy'n amlinellu ein 5 amcan caffael allweddol sy'n gyfrifol yn gymdeithasol. Bydd y rhain yn cael eu hadolygu'n rheolaidd ac ar ôl eu cwblhau byddant yn cael eu disodli gan amcanion caffael cymdeithasol gyfrifol newydd.