Digwyddiad Golchi Ceir Elusennol Gorsaf Dân y Tymbl yn Codi Dros £1,300

Ddydd Sadwrn, 20 Mehefin, cynhaliodd Diffoddwyr Tân Gorsaf Dân y Tymbl ddigwyddiad Golchi Ceir Elusennol i gefnogi dau achos pwysig.

Cynhaliwyd y digwyddiad ym maes parcio Leekes yn Cross Hands, a gweithiodd y criw yn ddiflino drwy gydol y dydd, yn golchi cerbydau ac yn ymgysylltu ag aelodau'r gymuned.  Diolch i haelioni’r rhai a ddaeth, cododd y digwyddiad swm anhygoel o ychydig dros £1,300, a fydd yn cael ei rannu’n gyfartal rhwng dau achos teilwng iawn:

Liwsi Our Brave Little Light

Mae Liwsi, sy'n ddwy oed, yn byw gyda dau gyflwr genetig hynod brin - Syndrom Cri du Chat a Thrawsleoliad Dyblygu Xq28. 

Mae'r ddau gyflwr yn brin ar eu pennau eu hunain, ond mae cael y ddau gyda'i gilydd mor brin fel y credir mai Liwsi yw'r unig blentyn hysbys yn y byd sy’n byw â'r union gyfuniad hwn.  O ganlyniad, mae angen amrywiaeth o driniaethau a chyfarpar arbenigol arni i gefnogi ei datblygiad a'i gofal dyddiol.

Elusen y Diffoddwyr Tân

Mae Elusen y Diffoddwyr Tân yn darparu gofal clinigol arbenigol, gydol oes, adsefydlu corfforol, a chefnogaeth iechyd meddwl i bersonél y Gwasanaeth Tân ac Achub sy'n gwasanaethu ac wedi ymddeol, a'u teuluoedd.

Mae eu gwaith yn sicrhau bod y rhai sy'n ymroi eu bywydau i amddiffyn eraill yn derbyn y gefnogaeth sydd ei hangen arnynt yn ystod cyfnodau o anaf, salwch neu galedi personol.

Mae Gwasanaeth Tân ac Achub Canolbarth a Gorllewin Cymru a Gorsaf Dân y Tymbl yn estyn eu diolch i Leekes, Cross Hands, McDonald’s, Cross Hands a Castell Howell am eu haelioni.