03.07.2026

Gwasanaeth Tân ac Achub Canolbarth a Gorllewin Cymru yn Cynorthwyo Gyda’r Ymateb i Ddaeargryn Venezuela

Yn dilyn y daeargrynfeydd erchyll a darodd Venezuela ar 24 Mehefin, mae personél Gwasanaeth Tân ac Achub Canolbarth a Gorllewin Cymru wedi cael eu hanfon yno i gefnogi gwaith chwilio ac achub rhyngwladol.

Gan Steffan John

Categorïau



Yn dilyn y daeargrynfeydd erchyll a darodd Venezuela ar 24 Mehefin, mae personél Gwasanaeth Tân ac Achub Canolbarth a Gorllewin Cymru (GTACGC) wedi cael eu hanfon yno i gefnogi gwaith chwilio ac achub rhyngwladol.

Tarodd y daeargrynfeydd, a oedd yn mesur 7.2 a 7.5 ar raddfa Richter, o fewn eiliadau i’w gilydd, gan ladd o leiaf 1,900 o bobl a gadael dros 10,000 wedi'u hanafu neu ar goll.

Fel rhan o Dîm Chwilio ac Achub Rhyngwladol y Deyrnas Unedig (UK-ISAR), mae personél GTACGC wedi ymuno â 68 o aelodau o 15 o Wasanaethau Tân ac Achub ledled y DU i helpu. Mae’r garfan hefyd yn cynnwys chwech o gŵn chwilio sydd wedi'u hyfforddi'n arbennig i gynorthwyo â’r gwaith o ganfod pobl yn y dinistr.

Ar hyn o bryd mae'r tîm yn gweithredu yn rhanbarth arfordirol Caraballeda, tua 10 milltir i'r gogledd o'r brifddinas, Caracas.   Ers cyrraedd, mae personél wedi bod yn cynnal chwiliadau systematig o strwythurau sydd wedi cwympo, gan ddefnyddio timau chwilio cŵn ac offer arbenigol i ddod o hyd i bobl.






Dywedodd Prif Swyddog Tân GTACGC, Craig Flannery:

"Rydym yn meddwl am bawb sydd wedi teimlo effaith y daeargrynfeydd dinistriol hyn yn Venezuela, ac yn cydymdeimlo â’r teuluoedd a'r cymunedau sy'n gorfod wynebu canlyniadau'r drasiedi hon.

Rydym yn hynod falch o'n personél UK-ISAR, sy'n gwirfoddoli eu sgiliau a'u harbenigedd i gefnogi gweithrediadau dyngarol ledled y byd. Maen nhw’n gweithio mewn amodau hynod heriol a pheryglus, ochr yn ochr â phartneriaid rhyngwladol, wrth i ymdrechion barhau i ddod o hyd i'r rhai sydd wedi'u dal o dan adeiladau sydd wedi disgyn.

Rydym yn parhau i fod mewn cysylltiad rheolaidd â'r tîm, a byddwn yn parhau i roi ein cefnogaeth lawn iddynt trwy gydol eu cyfnod yno."

Dywedodd Cadeirydd Cyngor Cenedlaethol y Penaethiaid Tân (NFCC), Phil Garrigan:

"Rydym yn dal i feddwl am bawb sydd wedi teimlo effaith y daeargrynfeydd dinistriol hyn a'r teuluoedd sy'n dal i aros am newyddion am eu hanwyliaid.

Ers cyrraedd Venezuela, mae tîm UK-ISAR wedi bod yn gweithio ddydd a nos, mewn amodau anhygoel o heriol, ochr yn ochr â chydweithwyr lleol a rhyngwladol fel rhan o ymateb byd-eang cydgysylltiedig.

Mae eu hymroddiad a'u proffesiynoldeb yn destun balchder mawr i wasanaethau tân ac achub y DU."



UK-ISAR yw ymateb swyddogol Llywodraeth y DU i drychinebau rhyngwladol, wedi'i ariannu a'i gefnogi gan FCDO (y Swyddfa Dramor, y Gymanwlad a Datblygu).

Dyma’r Gwasanaethau Tân ac Achub o’r DU sy'n rhan o’r ymateb yn Venezuela:

Swydd Gaer, Essex, Manceinion Fwyaf, Hampshire ac Ynys Wyth, Caint, Swydd Gaerhirfryn, Swydd Gaerlŷr, Swydd Lincoln, Llundain, Glannau Mersi, Canolbarth a Gorllewin Cymru, Yr Alban, De Cymru a Gorllewin Canolbarth Lloegr. 

Erthygl Flaenorol Erthygl Nesaf

Y Newyddion Diweddaraf

GWELD POB NEWYDDION